Ифтитоҳи ҳуҷраҳои тавонбахшии тиббию иҷтимоӣ

         Ба наздикӣ  дар назди шуъбаи кӯдаконаи  Беморхонаи марказии  ноҳияи Шаҳритуз   бо фармоиши Вазири тандурустӣ ва ҳифзи иҷтимоии аҳолии  Ҷумҳурии Тоҷикистон Н.Олимзода  бо мақсади дар амал табиқ намудани  банди 7-и нақша- чорабиниҳои Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ва филиали ГОПА мбХ дар Ҷумҳурии Тоҷикистон «Лоиҳаи пешгирии зӯроварии хонаводагӣ (PDV)барои солҳои 2017-2019» ду ҳуҷраи тавонбахшии тиббию иҷтимоӣ барои ҷабрдидагони зӯроварӣ дар оила    омодаю барои истифода қарор дода шуд.  Ҳуҷраҳои мазкур  бо дастгирии молиявии Ҳукумати Швейтсария бо тамоми таҷҳизоти зарурӣ аз он ҷумла телевизор, яхдон, кондитсионер, системаи гармидиҳӣ, ҷойҳои хоби модару кӯдак, рахти хоб, бозичаҳо, шифонер, зарфҳо барои чойнӯшию хӯрокхӯрӣ, гилему курпачаҳо ва ғайра таъмин шудааст.

      Дар маросими ботантана кушода шудани  ҳуҷраҳои тавонбахшии тиббию иҷтимоӣ барои ҷабрдидагони зӯроварӣ дар оила  дар назди шуъбаи кӯдаконаи  Беморхонаи марказии  ноҳия директори филиали ГОПА мбХ дар Ҷумҳурии Тоҷикистон Елена Максименко аз Ҷумҳурии Модавия, намояндаи Вазорати тандурустӣ ва ҳифзи иҷтимоии аҳолии Ҷумҳурии Тоҷикистон Мунира Ахмедова, муовини раиси вилояти Хатлон Махфират Хидирзода, раиси ноҳия Оймаҳмадзода Рамазон Алихон ва муовини раиси ноҳия Меҳринисо Раҷабзода ширкат варзиданд.

“Субҳи Шаҳритуз”