Парчамат бодо парафшон, Тоҷикистон!

            Субҳи 24 ноябр бо иқдоми мақомоти иҷроияи ҳокимияти давлатии ноҳия бахшида ба Рӯзи Парчами  давлатии Ҷумҳурии Тоҷикистон дар кӯчаи Исмрили Сомонии маркази ноҳия  бо иштроки ҳамаи қишрҳои ҷомеаи ноҳия роҳпаймоӣ доир гардид.  Роҳбарони ташкилоту муассисаҳо, хизматчиёни давлатӣ, соҳибкорон, омӯзгорону табибон, ҷавонон, донишҷуён ва даҳҳо нафар хурду бузурги ноҳия бо расмҳои Пешвои миллат,  парчами давлатӣ ва шиору овезаҳо   бо табъи болида ва шукргузорӣ аз  бахту саодати насиб гардидаашон  аз назди бозори марказӣ ҷониби Маркази савдои Ориён роҳ пеш гирифтанд.

           Дар майдони Исмоили Сомонии  маркази ноҳия  бахшида ба  бисту панҷумин солгарди ҷашни Рӯзи Парчами  давлатии Ҷумҳурии Тоҷикистон  ҳамоиши ботантана баргузор гардид. Дар ин чорбинии бошукуҳ кормандони мақомоти иҷроияи ҳокимияти давлатии ноҳия, роҳбарони ташкилоту муассисаҳо, раисони ҷамотҳои шаҳраку деҳот, масъулони мақомоти ҳифзи ҳуқуқ, собиқадорони меҳнат, ҷавонон ва аҳли ҷомеаи ноҳия ширкат варзиданд.

        Раиси ноҳия Оймаҳмадзода Рамазон Алихон бо Паёми табрикӣ баромад карда, иштирокчиёни ҳамоиш ва дар шахси онҳо ҳамаи сокинони ноҳияи бостонии Шаҳритузро  бо таҷлили 25-умин солгарди ҷашни Рӯзи Парчами  давлатии Ҷумҳурии Тоҷикистон  табрику муборакбод гуфта, ба ҳар кадомашон саломативу хушбахтӣ ва хонаи ободу рӯзгори осуда орзу намуд.   Ҳамзамон аз ҷониби    раиси ноҳия ба якчанд нафар кӯдакони маъюб туҳфаҳои хотиравӣ супурда шуд,ки аз ҷониби эшон бо сипосгузорию хушҳолӣ пазируфта шуд.

             Сипас кормандони соҳаи фарҳанг, ҷавонон ва варзишгарони ноҳия   дар васфи парчам суруду таронаҳо хонда, саҳнаҳои фарҳангии ҷолиб пешкаш намуданд.

“Субҳи Шаҳритуз”